Ungur, lesblindur, misþroska og munaðarlaus embættismaður hjá Reykjavíkurborg, Friðþjófur að nafni, er sendur upp að Korpúlfsstöðum til að leita að embættismönnum sem þangað hafa átt erindi en horfið sporlaust. Þegar þangað kemur kemst Friðþjófur að því að á Korpúlfsstöðum hefur hópur fólks hreiðrað um sig án vitundar yfirvalda. Hann ákveður að dvelja þarna og leita upplýsinga um afdrif embættismannanna en verður lítið ágengt, en kynnist hins vegar æ betur hinu litríka fólki sem þarna býr og hefur á endanum fundið sjálfan sig og stúlkuna sem hann elskar, auk þess sem embættismennirnir koma í leitirnar, en afdrif þeirra voru enn einkennilegri en talið var í upphafi.